សមត្ថកិច្ច ឃាត់ខ្លួនបុរសម្នាក់ ដែលដុតបំផ្លាញផ្ទះម្ដាយចិញ្ចឹមឆេះគ្មានសល់​

ភ្នំពេញ ៖ ជនសង្ស័យម្នាក់ត្រូវបានសមត្ថកិច្ចឃាត់ខ្លួន បន្ទាប់ពីស្រវឹងស្រាទៅដុតផ្ទះ ម្តាយ ចិញ្ចឹមរបស់ខ្លួន ឆេះម៉ដ្ឋគ្មានសល់ កាលពីល្ងាចថ្ងៃទី ថ្ងៃទី១៧ ខែមករា ឆ្នាំ២០២២ នៅត្រង់ ចំណុចភូមិថ្មី ឃុំកុមារាជា ស្រុកបាទី ខេត្តតាកែវ ។

ជនសង្ស័យឈ្មោះ  មិន ទូច ភេទប្រុស  អាយុ៣៨ឆ្នាំ រស់នៅភូមិថ្មី ឃុំកុមារាជា ស្រុកបាទី ខេត្តតាកែវ ។ ចំណែកជនរងគ្រោះ ឈ្មោះ ពុត ង៉ែត ភេទស្រី អាយុ៧៧ឆ្នាំ  រស់នៅភូមិ ឃុំកើតហេតុខាងលើ ។

ដោយឡែកផ្ទះរងខូចខាត ទំហំ៥ម៉ែត្រx៦ម៉ែត្រ សង់ពីឈើប្រក់ស័ង្កសី ត្រូវបានភ្លើងឆេះ ទាំងស្រុង អស់ទាំងទ្រព្យសម្បត្តិ ។

តាមសមត្ថកិច្ចបានឲ្យដឹងថា នៅវេលាល្ងាចថ្ងៃទី១៧ ខែមករា ឆ្នាំ២០២២ ជនសង្ស័យ ដែលជាកូនចិញ្ចឹមរបស់ជនរងគ្រោះ ផឹកស្រាស្រវឹង ហើយដុតផ្ទះម្តាយឆេះអស់ សូម្បីតែ អ្នកភូមិជួយមិនទាន់ផង។ ភ្លាមៗត្រូវបានសមត្ថកិច្ចចុះទៅ ឃាត់ខ្លួនបានជនសង្ស័យ រួចនាំ ទៅផ្នែកជំនាញស្រុក កសាងសំណុំរឿងតាមនីតិវិធី ៕