តាមរយៈភ្នាក់ងារសារព័ត៌មាន Isranews បានរាយការណ៍មកថា កាលពីថ្ងៃទី១ខែតុលាកន្លងមក ឧត្តមសេនីយ៍ឯក ប្រាវិត្រ វង្សសុវណ្ណ ឧបនាយករដ្ឋមន្ត្រីទទួលបន្ទុកផ្នែកសន្តិសុខជាតិរបស់ប្រទេសថៃ បានអញ្ជើញជាអធិបតីក្នុងកិច្ចប្រជុំគណៈកម្មាធិការរួមផ្នែកបច្ចេកទេស(JTC) ថៃ-កម្ពុជា(ភាគីថៃតែឯង) ដើម្បីពិចារណាទៅលើទម្រង់សេចក្តីព្រាងស្តីពីការចរចារទៅនឹងភាគីកម្ពុជាក្នុងការអភិវឌ្ឍន៍តំបន់ព្រំដែនសមុទ្រត្រួតស៊ីគ្នាដែលថៃនិងកម្ពុជាអះអាងជាម្ចាស់កម្មសិទ្ធិ(Overlapping Claims Area-OCA) រួមទាំងពិចារណាទៅសេចក្តីព្រាងការតែងតាំងគណៈកម្មការបែងចែកដែនសមុទ្រ និងគណៈកម្មការទាក់ទងនឹងការអភិវឌ្ឍរួមផ្សេងផងដែរ។ យ៉ាងណាក៏ដោយបន្ទាប់ពីកិច្ចប្រជុំបញ្ចប់ ក្រុមការងារមិនបានផ្តល់ជាការថ្លែងសារដល់អ្នកសារពត៌មាននោះទេ។
ក្រុមការងារសារព័ត៌មាន Isranews បានធ្វើការទាក់ទងទៅកាន់លោក សារ៉ាវុឌ កែវតាធិប ប្រធានអគ្គនាយកដ្ឋានរ៉ែឥន្ធនៈ តាមរយៈទូរស័ព្ទ។ ដោយលោកគ្រាន់តែបានតបយ៉ាងខ្លីៗថា មិនអាចតបបាន ព្រោះជាការប្រជុំសម្ងាត់ ហើយលោកក៏មិនស្ថិតក្នុងផ្នែកលេខាធិការរដ្ឋានដែរ ដោយផ្នែកលេខាធិការនៃគណៈកម្មាធិការមួយនេះគឺ ក្រសួងការបរទេសឯណោះ។ ក្រុមការងារសារព័ត៌មាន Isranews បានទទួលទម្រង់សេចក្តីព្រាង ស្តីពីការចរចារជាមួយភាគីកម្ពុជាក្នុងការអភិវឌ្ឍតំបន់ព្រំដែនសមុទ្រត្រួតស៊ីគ្នាដែលថៃនិងកម្ពុជាអះអាងជាម្ចាស់កម្មសិទ្ធិ ដែលត្រូវបានដាក់ចូលក្នុងអង្គប្រជុំ ការចរចានេះមានគោលបំណងធំៗចំនួន៣គឺ
១. ដើម្បីដោះស្រាយបញ្ហាវិវាទទាក់ទិននឹងតំបន់សមុទ្រដែលភាគីថៃនិងកម្ពុជាអះអាងជាម្ចាស់កម្មសិទ្ធិ
២. ធ្វើការពិចារណាស្របទៅតាមកិច្ចព្រមព្រៀងMOUរវាងរាជរដ្ឋាភិបាលទាំង២ ដែលមានតាំងពីឆ្នាំ២០០១មកម្ល៉េះ។
៣. បន្តការចរចាក្រោមការពិនិត្យនៃគណកម្មាធិការរបស់ប្រទេសទាំង២
គោលដៅសំខាន់(របស់ប្រទេសថៃ)ក្នុងការចរចានេះគឺ
១. ធ្វើយ៉ាងណាអោយប្រទេសថៃទទួលបានផលប្រយោជន៍ច្រើនបំផុតគ្រប់ផ្នែក
២. រក្សាសិទ្ធិប្រទេសថៃស្របតាមច្បាប់អន្តរជាតិទាំងរឿងការបែងចែកព្រំដែនសមុទ្រនិងការអភិវឌ្ឍរួម
៣. ពិចារណានិងរកមធ្យោបាយផ្សេងដើម្បីអោយប្រទេសទទួលបានផលប្រយោជន៍ច្រើនបំផុត ហើយរាល់ដំណើរការការចរចាត្រូវប្រកបដោយសុក្រឹតភាព។
គួរបញ្ជាក់ផងដែរថាតំបន់ត្រួតស៊ីគ្នាផ្នែកសមុទ្ររវាងថៃនិងកម្ពុជាមានទំហំប្រមាណ២៦០០០ គីឡូម៉ែត្រការ៉េ ត្រូវបានគេប៉ាន់ស្មានថាមានឧស្ម័នធម្មជាតិមហាសាលគិតជាតម្លៃប្រមាណ១០០ពាន់លានដុល្លារ និងប្រេងឆៅគិតជាតម្លៃប្រមាណ ៤៤ពាន់លានដុល្លាឯណោះ។
