ខេត្តព្រះសីហនុ ៖ តាមសេចក្តីរាយការណ៍បានឲ្យដឹងថា នៅថ្ងៃទី ១២ ខែ ធ្នូ ឆ្នាំ ២០២១ នេះ ដោយមានការសម្របសម្រួលពីស្ថាប័នអយ្យការ កម្លាំងសមត្ថកិច្ច មន្ទីរប្រឆាំងបទល្មើសគ្រឿងញៀន បានចុះសហការជាមួយកម្លាំងនគរបាល ខេត្តព្រះសីហនុ ខេត្តកំពង់ស្ពឺ ខេត្តកោះកង់ និងរាជធានីភ្នំពេញ បើកប្រតិបត្តិការ បង្ក្រាបករណីផលិតគ្រឿងញៀន ទ្រង់ទ្រាយធំមិនធ្លាប់មាន ស្ថិតនៅក្នុងរោងចក្រផលិតដំណាប់ស្វាយមួយកន្លែងស្ថិតក្នុងភូមិដំបងវេញ ឃុំសង្កែសាទ ស្រុកឱរ៉ាល់ ខេត្តកំពង់ស្ពឺ ។
ការបង្ក្រាបនេះ បង្កឲ្យមានការប៉ះទង្គិចគ្នារហូតឈានដល់ការផ្ទុះអាវុធនៅ លើផ្លូវជាតិលេខ ៤ បណ្តាលឲ្យជនជាតិចិនម្នាក់បានស្លាប់ ខណៈក្រុមឈ្មួញកំពុងដឹកគ្រឿងញៀនជាច្រើនឆ្ពោះទៅកាន់ ខេត្តព្រះសីហនុ ។
ប្រភពព័ត៌មានមិនទាន់ផ្លូវការបានឲ្យដឹងថា ជនជាតិចិនដែលបានស្លាប់នោះ គឺជាក្រុមឧក្រិដ្ឋជនដែលបាន
បាញ់ប្រហារមកលើសមត្ថកិច្ចនៅត្រង់ចំណុចលើផ្លូវជាតិលេខ ៤ ស្ថិតក្នុងភូមិសាស្ត្រស្រុកកំពង់សិលា ខេត្តព្រះសីហនុ ហើយក៏ត្រូវសមត្ថកិច្ចបាញ់ទប់ទល់វិញបណ្តាលឲ្យឧក្រិដ្ឋជនដែលជាជនជាតិចិនម្នាក់ត្រូវគ្រាប់ស្លាប់នៅនឹងកន្លែង និងម្នាក់ទៀតត្រូវចាប់ខ្លួន ជាមួយរថយន្ត ១គ្រឿង ។
ក្នុងករណីបង្ក្រាបនោះ សមត្ថកិច្ចបានរឹបអូសគ្រឿងញៀន ប្រមាណ ១.៤០០ គីឡូក្រាម ដែលឧក្រិដ្ឋជនបានផលិតនៅក្នុងរោងចក្រផលិត ដំណាប់ស្វាយនោះ។
