សម្តេចតេជោ ហ៊ុន សែន បានកំណត់យកថ្ងៃទី២៥ ខែមករា​ នេះ ផ្សាយជាព្រឹត្តិការណ៍រាប់ថយក្រោយ កម្ពុជាធ្វើជាម្ចាស់ផ្ទះស៊ីហ្គេម២០២៣

ភ្នំពេញ៖​ សម្តេចតេជោ ហ៊ុន សែន នាយករដ្ឋមន្ត្រីកម្ពុជា​ បានថ្លែងថា​ នៅថ្ងៃទី២៥ ខែមករា​ ឆ្នាំ២០២៣​ ខាងមុខនេះ គឺជាថ្ងៃដែលយើងរាប់ថយក្រោយ​ ១០០ថ្ងៃ នៃព្រឹត្តិការណ៍ស៊ីហ្គេមនៅកម្ពុជា ហើយត្រូវតែធ្វើឲ្យព្រឹត្តិការណ៍នេះផ្ទុះឡើង។ សម្តេចបានថ្លែង នៅក្នុងឱកាសអញ្ជើញប្រគល់សញ្ញាបត្រដល់និស្សិតសាកលវិទ្យាល័យឯកទេសនៃកម្ពុជា(CUS) ជិត៧០០០នាក់​ នៅព្រឹកថ្ងៃទី២៣ ខែមករា​ ឆ្នាំ២០២៣។

ប្រសាសន៍សម្តេចតេជោ បានថ្លែងថា៖​ “កម្ពុជារង់ចាំប្រមាណជា ៦០ឆ្នាំហើយ ដោយសារតែប្រទេសយើងមិនអំណោយផល ដោយសារតែសង្រ្គាម បន្ទាប់មកយើងមានសន្តិភាព ប៉ុន្តែយើងគ្មានហេដ្ឋារចនាសម្ព័ន្ធ ប៉ុន្តែឥឡូវយើងមានឱកាសធ្វើជាម្ចាស់ផ្ទះស៊ីហ្គេម។ ដូច្នេះព្រឹត្តិការណ៍រាប់ថយក្រោយ​ ១០០ថ្ងៃនេះ ផ្សាយឲ្យបានផុសផុល”។

នៅក្នុងឱកាសនោះសម្តេចតេជោ ហ៊ុន សែន ក៏បានថ្លែងឱ្យដឹងដែរថា ព្រះមហាក្សត្រ​កម្ពជា​ ក៏នឹងយាងទៅកាន់ខេត្តសៀមរាបនាពេលខាងមុខ ដើម្បីប្រទានភ្លើងគប់ ហើយភ្លើងនោះនឹងហែរទៅកាន់បណ្តាប្រទេសនានា បន្ទាប់មកទើបចូលមកកម្ពុជា។
សម្តេចនាយករដ្ឋមន្ត្រី​ ក៏បានបញ្ជាក់ថា ថវិការដែលកម្ពុជាត្រូវប្រើក្នុងព្រឹត្តិការណ៍ស៊ីហ្គេម២០២៣​ នៅកម្ពុជាគឺ​ ១០០លានដុល្លារអាមេរិក៕