
ស្វាយរៀង ៖ បុរសជនជាតិចិនម្នាក់ បើករថយន្តLAND CRUISER បោះពួយក្នុងល្បឿនលឿនក៏បានរេចង្កូតទៅបុករបងផ្ទះប្រជាពលរដ្ឋ បាក់រលើងទាំងរបង រថយន្តក្រឡាប់ជាច្រើនត្រឡប់ខូចខាត់ខ្ទេច សំណាងល្អអ្នកបើកបររបួសស្រាល ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើង កាលពីវេលាម៉ោង ១១ៈ១៥ នាទីព្រឹក ថ្ងៃទី២៥ ខែតុលា ឆ្នាំ២០២២ ស្ថិតនៅក្នុងភូមិកោះក្បានខាងជើង ឃុំសំរោង ស្រុកចន្ទ្រា ខេត្តស្វាយរៀង ។
ប្រភពពីប្រជាពលរដ្ឋបានឲ្យដឹងថា នៅមុនពេលកើតហេតុ គេឃើញរថយន្តLAND CRUISER មួយគ្រឿង ពណ៌ស ពាក់ស្លាកលេខ ភ្នំពេញ 2BD-0003 បើកបរដោយបុរសជនជាតិចិន ធ្វើដំណើរក្នុងទិសដៅពីកើតទៅលិច បោះពួយក្នុងល្បឿនលឿន ស្រាប់តែដល់ចំណុចកើតហេតុ ក៏បានរេចង្កូតទៅស្តាំ ជ្រុលទៅបុករបងផ្ទះប្រជាពលរដ្ឋ បាក់រលើង ចំណែករថយន្តក្រឡាប់ជាច្រើនត្រឡប់ ។
ក្រោយពេលកើតហេតុ សមត្ថកិច្ចនាំអ្នកបើកបរទៅសាកសួរនៅប៉ុស្តិ៍ រថយន្តត្រូវបានសមត្ថកិច្ចស្ទូចយកទៅរក្សាទុកនៅផ្នែកជំនាញនៃអធិការដ្ឋាននគរបាលស្រុក រងចាំដោះស្រាយផលប៉ះពាល់ជាមួយពលរដ្ឋជាក្រោយ ៕