គ្រោះថ្នាក់ចរាចរណ៍ ជិះម៉ូតូលឿនជ្រុលបុកខឿនចិញ្ចើមផ្លូវ បណ្ដាលឲ្យបុរសម្នាក់ស្លាប់ភ្លាមៗនៅនឹងកន្លែងកើតហេតុ និងម្នាក់ទៀតរងរបួសធ្ងន់

ភ្នំពេញ ​៖ បុរសម្នាក់ស្លាប់ភ្លាមៗនៅនឹងកន្លែងកើតហេតុ និងម្នាក់ទៀតរងរបួសធ្ងន់ បញ្ជូនទៅសង្គ្រោះបន្ទាន់នៅមន្ទីពេទ្យ ដោយសារជិះម៉ូតូលឿនជ្រុលទៅបុកខឿនចិញ្ចើមផ្លូវ ។

ហេតុការណ៍​នេះកើតឡើងកាលពីវេលាម៉ោង១១ និង៥០នាទីយប់ ​ថ្ងៃទី​៧ ខែសីហា​ ឆ្នាំ​២០២២ តាមបណ្តោយផ្លូវ ត្រង់ចំណុចខាងមុខវត្តព្រែកប្រា សង្កាត់​ព្រែក​ប្រា​ ខណ្ឌច្បារអំពៅ​ រាជធានីភ្នំពេញ ។

ប្រភពពីកន្លែងកើតហេតុបានឲ្យដឹងថា មុនកើតហេតុគេឃើញបុរស២នាក់ ជិះម៉ូតូម៉ាកហុងដាឌ្រីម ស៊េរី​ឆ្នាំ​២០២២ ពណ៌ខ្មៅ​ ពាក់ស្លាកលេខភ្នំពេញ 1JN-3877​ ធ្វើ​ដំណើរពីត្បូងទៅជើងក្នុងល្បឿនលឿន​ លុះមកដល់ចំណុចកើតហេតុ ក៏បានរេចង្កូតទៅបុកខឿនចិញ្ចើមផ្លូវពេញទំហឹង បណ្តាលឱ្យមនុស្សខ្ទាតចេញពីម៉ូតូ បណ្ដាលឲ្យបុរសម្នាក់ បោកក្បាលស្លាប់ភ្លាមៗ  និងម្នាក់ទៀត​រងរបួសធ្ងន់ត្រូវបានរថយន្តសាមុយដឹកបញ្ជូនទៅសង្គ្រោះបន្ទាន់ ។

ជនរងគ្រោះស្លាប់មានឈ្មោះ អុន សារាជ អាយុ២២ឆ្នាំ ស្នាក់នៅម្តុំក្រោយវត្តព្រែកប្រា ជាមួយប្រពន្ធមានទម្ងន់ចំនួន៥​ ខែ។

មិត្តភក្តិរបស់ជនរងគ្រោះទាំង២​ បានឲ្យដឹងថា មុនកើតហេតុ ពួកគេបានជួបជុំគ្នាហូបអី ហើយពេលនោះជនរងគ្រោះដែលស្លាប់ ​បានខ្ចីម៉ូតូរបស់មិត្តម្នាក់ទៀត ប្រាប់ថាជិះទៅផ្ទះ​ ដោយនាំគ្នាឆ្ងល់ថាមិចក៏ទៅយូរម៉េស ហើយតេមិនលើកទៀត ក៏នាំគ្នាជិះមករក​ ស្រាប់តែប្រទះឃើញមិត្តភក្តិរ ដេកក្នុងថ្លុកឈាមក៏ទាក់ទងហៅឡានពេទ្យ តែជា​អកុសល​ជនរងគ្រោះ​បានស្លាប់ម្នាក់​បាត់​ទៅហើយ ។

ក្រោយកើតហេតុសមត្ថកិច្ចបានចុះមកដល់ ធ្វើការវាស់វែងរួច បានយកម៉ូតូទៅរក្សាទុកដើម្បីរង់ចាំគ្រួសារមកយកម៉ូតូ ចំណែកសពក្រោយធ្វើកំណត់ហេតុរួច ត្រូវបានក្រុមគ្រួសារ យកទៅធ្វើបុណ្យទៅតាមប្រពៃណី៕