រថយន្តដឹកអ្នកដំណើររបស់ក្រុមហ៊ុនវីរៈប៊ុនថាំ បុកគោយន្តកន្ត្រៃ បណ្ដាលឲ្យមនុស្ស ០៣នាក់ ស្លាប់យ៉ាងអាណោចអាធ័ម

ប្រភពពីកន្លែងកើតហេតុបានឲ្យដឹងថា មុន​កើតហេតុ​ រថយន្ត​ក្រុមហ៊ុនវីរៈប៊ុនថាំ ពាក់ស្លាកលេខ ភ្នំពេញ៖ 3E-1209 បើក​បរដោយបុរសម្នាក់ មិនស្គាល់អត្តសញ្ញាណ បានបើកបរក្នុងទិសដៅពីកើតទៅលិច លុះមកដល់ចំណុចកើតហេតុ ក៏បានរេចង្កូតទៅបុកជាមួយនិងគោយន្តកន្ត្រៃ បើកបរបញ្ច្រាស់ទិសគ្នាពេញទំហឹង ធ្វើឱ្យគោយន្តកន្ត្រៃ ដាច់ចេញពីគ្នាខ្ទេច បណ្ដាល​មនុស្សប្រុសស្រី ០៣នាក់ ស្លាប់យ៉ាងអាណោចអាធ័ម ។

សពជនរងគ្រោះទាំង ០៣នាក់ មាន០២នាក់ ជាប្ដីប្រពន្ធនឹងគ្នា និងម្នាក់ទៀតជាស្ត្រី ចំណែកអ្នករួមដំណើរជាច្រើននាក់ទៀត រងរបួសធ្ងន់និងស្រាល ។

ប្រភពពីសមត្ថកិច្ចបានឲ្យដឹងថា សពជនរងគ្រោះទាំង០៣នាក់ជាអ្នករស់នៅភូមិជាមួយគ្នា ដែលស្ថិតនៅក្នុងភូមិទឹកជុំ ស្រុកប្រនេតព្រះ ខេត្តបន្ទាយមានជ័យ ។

ក្រោយកើតហេតុ សមត្ថកិច្ច បានធ្វើការវាស់វែងរួច បានយករថយន្ត និគោយន្តទៅរក្សាទុក ដើម្បីរងចាំដោះស្រាយគ្នានៅពេលក្រោយ ចំណែកសពជនរងគ្រោះ សមត្ថកិច្ចបានធ្វើកំណត់ហេតុរួច ប្រគល់ជូនក្រុមគ្រួសារ សាច់ញាតិ យកទៅធ្វើបុណ្យតាមប្រពៃណី ។