កុលបុត្រខ្មែរទទួលបានមេដាយពីការប្រកួតគណិតវិទ្យា នៅក្រុងញូវយ៉ក សហរដ្ឋអាមេរិក បានមកដល់កម្ពុជាវិញហើយ ជាមួយការស្ពាយនូវកិត្តិយស និងមោទនភាពជូនជាតិមាតុភូមិផងដែរ

ការប្រកួតគណិតវិទ្យាក្រោមកម្មវិធី COPERNICUS OLYMPIAD មានបេក្ខជនមកពីប្រទេសចំនួន៩ចូលរួមប្រកួតប្រជែងរួមមាន៖ កម្ពុជា អាមេរិក ហ្វីលីពិន អង់ហ្កោឡា ប្រេស៊ីល ប៊ុលហ្គារី គីជីស្ថាន ឡាវ និងវៀតណាម។

ជាលទ្ធផលកុលបុត្រកម្ពុជាដែលបញ្ជូនទៅចូលរួមប្រកួត ៣៤រូប ទទួលបានមេដាយមាស ៣រូប ប្រាក់ ១១រូប និងសំរឹទ្ធ ១៦រូប។

អ្នកមេដាយមាសរួមមាន៖

១ ឈ្មោះ ទូច ម៉ូនីកា សិស្សថ្នាក់ទី១០ មកពីសាលារៀន Westgate International School,

២ ឈ្មោះ ជា សឺហ្វុង សិស្សថ្នាក់ទី៨ មកពីសាលារៀន AIS (American Intercon School)

និងទី៣ ឈ្មោះ រិទ្ធ នីវិសាលស្ណុ សិស្សថ្នាក់ទី១១ មកពីសាលារៀនវិទ្យាល័យ ឬស្សីកែវ។

យុវជនឈ្មោះ រិទ្ធ នីវិសាលស្ណុ ជាបេក្ខជនមេដាយមាស មានលំដាប់ពិន្ទុខ្ពស់ជាងគេ គឺ ៨៤ លើ១០០ យុវជន រិទ្ធ នីវិសាលស្ណុ ធ្លាប់ចូលរួមប្រកួតប្រជែងគណិតវិទ្យាក្នុងកម្មវិធីជាច្រើន ហើយគេទទួលបានមេដាយមាស ប្រាក់ និងសំរឹទ្ធរហូតដល់ទៅជាង ១០មេដាយ។

សូមជូនពរឱ្យពួកគេបន្តទទួលបានជោគជ័យលើការសិក្សា និងសាងសមិទ្ធផលសម្រាប់ខ្លួនឯង គ្រួសារ និងជាតិមាតុភូមិ។