ភ្នំពេញ ៖ មន្ត្រីកងរាជអាវុធហត្ថខេត្តស្វាយរៀង នៅថ្ងៃទី ២៧ ខែ ឧសភា ឆ្នាំ ២០២២ បានឃាត់ខ្លួននិងបញ្ជូនខ្លួនជនសង្ស័យចំនួន ០៤នាក់ ទៅកាន់ស្ថាប័នអយ្យការអមសាលាដំបូងខេត្តស្វាយរៀង ដើម្បីសាកសួរបន្ថែម និងសម្រេចផ្ដន្ទាទោផសទៅតាមផ្លូវច្បាប់ ទាក់ទងនិងករណី ជួញដូរនូវសារធាតុញៀន ដែលប្រតិបត្តិការនេះធ្វើឡើងនៅត្រង់ចំណុចភូមិថ្មី ឃុំស្វាយចេក ស្រុករំដួល ខេត្តស្វាយរៀង។
ប្រភពពីមន្រ្តីកងរាជអាវុធហត្ថខេត្តស្វាយរៀងបានបន្តឱ្យដឹងទៀតថា ជនសង្ស័យមានចំនួន ០៤នាក់៖ ១-ឈ្មោះ ដួង សាវ៉េត ភេទប្រុស អាយុ ៤១ឆ្នាំ មុខរបរមិនពិតប្រាកដ ។២-ឈ្មោះ ប៉ុញ សារ៉េន ភេទប្រុស អាយុ ២៣ឆ្នាំជនជាតិខ្មែរ មុខរបរកម្មកររោងចក្រ ។ ៣-ឈ្មោះ ទី សំអូន ភេទប្រុស អាយុ ១៩ ឆ្នាំ ជនជាតិខ្មែរ មុខរបរកម្មកររោងចក្រ ជនសង្ស័យទាំង០៣ខាងលើមានទីលំនៅភូមិថ្មី ឃុំស្វាយចេក ស្រុករំដួល ខេត្តស្វាយរៀង។ និងជនសង្ស័យម្នាក់ទៀតមានឈ្មោះ សូ ឧត្តមរាសី ភេទប្រុស អាយុ ២៩ ឆ្នាំ មុខរបរកម្មកររោងចក្រ រស់នៅភូមិព្រៃគាវ ឃុំកំពង់ចក ស្រុករំដួល ខេត្តស្វាយរៀង។ពួកគេទាំង០៤នាក់ខាងលើ ត្រូវកម្លាំងនគរបាលកងរាជអាវុធហត្ថ ចាប់ឃាត់ខ្លួន នៅ ថ្ងៃទី ២៥ ខែ ឧសភា ឆ្នាំ ២០២២ នៅក្នុងលំនៅដ្ឋានម្ចាស់ផ្ទះ ឈ្មោះ ដួង សាវ៉េត។
ក្រោយពេលឃាត់ខ្លួនជនសង្ស័យខាងលើសមត្ថកិច្ចដកហូតបានវត្ថុតាំងរួមមាន ៖ គ្រឿងញៀនប្រភេទម៉ាទឹកកក ចំនួន ០២កញ្ចប់ ទម្ងន់ ៣៧,៦៨ ក្រាម, ជញ្ជីងសម្រាប់ថ្លឹងគ្រឿងញៀនចំនួន ០១គ្រឿង – ម៉ូតូចំនួន ០២គ្រឿង, ទូរស័ព្ទដៃចំនួន ០៥គ្រឿង និងសម្ភារសម្រាប់ប្រើប្រាស់គ្រឿងញៀនមួយចំនួនទៀត។
បច្ចុប្បន្ន ជនសង្ស័យទាំង ០៤នាក់ខាងលើ កំពុងសាកសួរចម្លើយ នៅឯអយ្យការអមសាលាដំបូងខេត្តស្វាយរៀង នៅឡើយ៕
